身邊很多朋友抱怨...離晒譜~~樓價咁高，呢世都唔使旨意買樓！
唔啱聽 Dozy 都要講...高乜鬼~~係你哋自己冇認真去面對啫！
朋友嗤之以鼻...你楂住幾層樓梗係咁講啦！超~~（無言~~）
發表這篇言論，絕不是想點火，更不是想閃光，只是想年青人不要執迷。SARS 期間，Dozy 跟其他年青人一樣，滿身卡數，債務重組後花了年半時間還錢。當時我何嘗不是滿腹牢騷，抱怨買不起樓？到了 2005 年，儲了一筆本錢，加上炒股有斬獲，就上車了，發現上車其實不難！後來大牛市繼續玩這個遊戲，買樓就更容易。
．七萬元一呎？關我鬼事咩？！
．專業人士買唔起樓？係你問題啫！
．增加供應就掂？咪玩啦！
．施政報告？條橋幾好丫！
七萬元一呎？關我鬼事咩？！
近日傳媒大字標題，香港分層物業創世界紀錄...然後就大做文章，打工仔連個廁所都買唔起云云。大佬呀！七萬元一呎的樓係俾人住架咩？！係俾人威架嘛！係要攞七萬元一呎的天匯嚟講，冇你辦法喎！天價豪宅...就好似環球小姐，要嚟睇架，唔係擁有架！其實...港九新界還有很多、很多百多萬的上車盤，是你沒有留意而已。
專業人士買唔起樓？係你問題啫！
又有報章大字標題...專業人士都買唔起樓，絕對是他們自己的問題，太大想頭？無知？不懂理財？自己揀個原因啦！朋友 J 說了一個故事...某君女友花了近 50,000 元買了一隻 Rolex 給男友，某君很感動，想給她買一顆一卡鑽戒~~真係聽到我 O 晒咀，講真...隻 Rolex 加埋隻鑽戒已經可以上車啦！又有朋友說...每年不到日本玩兩次，人生就冇意義~~小姐...兩個人的機票酒店連 Shopping，每次四、五萬埋單，去少年日本已經上到車啦！現在銀行水浸，按揭借 90% 話都冇咁易，十幾萬就可以買樓啦。
你可能會話...買咗唔使供呀？其實...借 100 萬，月供只是 4,000 多元，半個 LV 都唔止啦。碌卡分期買 LV 就得，儲錢買樓就牙痛咁聲，想點呀？送俾你好唔好？！莫講話專業人士，普通人都得啦！只係你自己覺得 LV 重要過層樓啫~~
增加供應就掂？咪玩啦！
現時的新盤，凡新必豪，原因是發展商要賺到盡，你買唔起？唔緊要...祖國大把人爭住買！為甚麼祖國那麼多人爭着買？錢從那裡來？...點知呀？我只知道一個月入數千元的小鎮官員可以住千多萬的豪華別墅，可以到澳門輸數千萬。增加供應？定期賣地？你覺得發展商會明知可以賣 30,000 元的，會因此而減到 3,000 元嗎？除非增加很多、很多供應，你覺得現在的領導層，還敢再提類似 85,000 的方案嗎？
施政報告？條橋幾好丫！
施政報告沒有刻意增加土地供應，其實並不需要，樓市泡沫尚未形成。鼓勵發展商收購舊樓重建，一舉兩得。至於活化工廠大廈，更加係煲呔歷來少見的 Good Idea，講真...香港仲邊鬼度有工業先得架？大部份工廠大廈，都已經偷偷摸摸變晒做寫字樓、開倉特賣啦，何必浪費地方？東南九龍、西九龍、港島東、港島南等等，不知幾多工廠靚地，太古城旁邊都有好幾幢工廠大廈，改做住宅唔好咩？
買樓不難！投資物業賺錢更不難！
只是...需要改變心態，提高理財技巧！
要繼續埋怨，還是參與遊戲，撈它一筆？自己決定吧！
即將會辦一些有關的講座、課程，有興趣研一起研究~~
